Golden State Valkyries өздерінің бар-жоғы екінші маусымында-ақ WNBA чемпионы атанды. Финалдағы шешуші ойында команда Atlanta Dream клубын 68:63 есебімен тізе бүктірді.
Тартысты өткен жетінші матчта Габби Уильямс ерекше көзге түсіп, 30 ұпай жинады. Ол WNBA финалының ең үздік ойыншысы атанды. Уильямс ұпайларының 28-ін екінші таймда еншілеп, аяқталуға екі минуттан сәл асқанда салған үш ұпайлық добымен есепті 60:57 етіп алға шығарды. Одан кейін Тиффани Хейес пен Вероника Бертонның айып добтары жеңісті бекітті.
«Мұндай қуат пен жағымды энергия бар жерде бәрі оңай. Мен ештеңені өзгертпес едім», – деді Уильямс. «Бізге тек жақсы адамдар керек болды. Бізде жеңімпаздар бар, жеңу үшін денесін тосуға дайын ойыншылар бар. Олар ұпай жинауды ойламайды, қорғаныс пен допты қайтаруға ғана дайын. Қолдан келгеннің бәрін жасауға тырыстық, осылайша әсем орта қалыптастырдық».
Бапкер Натали Накасе де Уильямсты командасының шешуші ойыншысы деп бағалады. «Габби – біздің соңғы нүктеміз. 30 ұпаймен ойынды аяқтауы – керемет нәтиже. Мен үшін маусымның ең құнды ойыншысы – финалдың ең құнды ойыншысы. Мұндай мәртебеге жету үшін плей-оффтан өтіп, жеті ойыннан тұратын сериядан өту керек. Ол – әлемдегі ең құнды ойыншы, сөзсіз», – деді ол.
Сан-Францискодағы Chase Center аренасында өткен кездесуді 18 мыңнан астам жанкүйер тамашалады. Ал 18 жылдық тарихында төртінші рет финалда сүрінген Atlanta Dream сапындағы жұлдыз Энжел Рис өз командасының болашағына сенетінін айтты: «Бұл – бір топпен өткізген ең қызықты кезеңім. Бұл – мен қатысқан ең бәсекелі команда. Бүгін ұтылдық екен деп, болашақта чемпион болмаймыз деген сөз емес».
