Всемирлік бокс қауымдастығы (WBA) қазақстандық боксшы Армат Арманұлының угандалық Шадири Муса Бвогиді жеңген жекпе-жегіне жоғары баға берді. Актөбеде өткен бокс кешінде Арманұлы техникалық нокаутпен басым түсіп, WBA Asia чемпионы атағын қорғап қалды.
Ұйымның мәлімдеуінше, Армат Арманұлы WBA рейтингінде 15-орында тұр және жоғары деңгейдегі бокс үлгісін көрсетті. Бірінші бөлікте қарсыласы басымдық танытқанымен, қазақстандық спортшы сабыр сақтап, соққыларын денеге дәл бағыттау арқылы жекпе-жектің беталысын өз пайдасына өзгертті.
Сегізінші раундтың 0:48 уақытында Бвоги нокдауннан кейін кездесуді жалғастырудан бас тартты. Осылайша, Арманұлына техникалық нокаутпен жеңіс берілді.
«Армат Арманұлы өте жақсы жекпе-жек өткізді! Құттықтаймыз!» — делінген WBA хабарламасында.
Армат Арманұлы WBA Asia чемпионы белбеуін өткен жылдың желтоқсан айында тәжікстандық Авзалбек Куранбаевты жеңіп иеленген еді. Бұл — оның атақты екінші рет сәтті қорғауы.
