Елордадағы «Астана» Қазақстан Премьер-Лигасының 26-туры аясында «Ордабасыға» қарсы өтетін орталық матчқа негізгі құрамды апарады.
Бұған дейін әлеуметтік желіде столицалық клуб бұл кездесуде қосалқы құраммен ойнауы мүмкін деген ақпарат тараған. Ол әңгіме негізгі құрам ойыншыларының жалақы бойынша берешекке байланысты алаңға шықпауы ықтимал деген болжаммен ұштасқан еді.
Алайда команда маңызды ойында толыққанды күшпен ойнауға бекінгені белгілі болды.
Қазір КПЛ-2026 турнир кестесінде алда «Қайрат» тұр: оның қоржынында 57 ұпай бар. Ал «Ордабасы» 55 ұпаймен екінші орында, яғни көшбасшыдан небәрі екі ұпайға қалып келеді.
Алматылық клуб күнтізбе тұрғысынан да айқын басымдыққа ие: қалған алты кездесудің төртеуін өз алаңында өткізеді. Ал шымкенттік ұжымға осы аралықта үйдегі екі ғана ойын тиесілі.
