Беларусь Ұлттық олимпиада комитетінің басшысы Виктор Лукашенко Астанада өткен әлем чемпионатында ел балуандарының бес медаль иеленуіне байланысты құттықтау айтты. Ол бұл жетістікке ерекше мән беріп, спортшылардың еңбегін жоғары бағалады.
Лукашенко грек-рим күресінен 97 келіге дейінгі салмақта әлем чемпионы атанған Кирилл Маскевичті бөле-жара атап өтті. Оның сөзінше, бұл жеңіс тек алтын медаль ғана емес, миллиондаған беларусь жанкүйеріне зор қуаныш сыйлаған.
«Сенің жеңісің елге тек планеталық форумның алтын жүлдесін ғана емес, ұмытылмас жарқын әсер мен мақтаныш сезімін де тарту етті. Сенің құрметіңе Барыс-Арена төрінде Беларусь гимні ойналып, отанымыздың туы көтерілді»
Ол сондай-ақ спортшылардың, бапкерлер штабының және балуандарды даярлауға қатысқан мамандардың еңбегін атап өтті. Лукашенконың айтуынша, бұл нәтиже Беларусь күрес мектебінің биік деңгейін тағы бір мәрте дәлелдеді.
«Сіздер бәріңіз бірге Беларусь күрес мектебінің жоғары деңгейін, бай дәстүрге адалдықты және ұрпақтар сабақтастығын тағы бір рет көрсеттіңіздер. Әрқайсысыңыз ортақ іске өз үлесін, жан жылуын қостыңыздар. Алда тағы да талай лайықты әрі жарқын жеңіс болсын, сол жетістіктермен мақтанатын болайық!»
Беларусь балуандары жалпы есепте бес жүлде жеңіп алды. Кирилл Маскевич алтын медаль алса, Пауэл Глинчук (грек-рим күресі, 130 келіге дейін), Шуай Мамедов (грек-рим күресі, 77 келіге дейін), Ирина Курочкина (әйелдер күресі, 57 келіге дейін) және Магомедхабиб Кадимагомедов (еркін күрес, 79 келіге дейін) қола жүлдегер атанды.
Спорттық күрестен әлем чемпионаты Астанада 24 қазан мен 1 қараша аралығында өтіп жатыр. Жарыс бағдарламасына грек-рим, еркін және әйелдер күресі енгізілген.
