Испанияның екінші дивизионында өнер көрсететін «Эльденсе» клубы Лионель Месси команда акцияларының басым бөлігін сатып алуға қатысты алдын ала келісімге келгенін хабарлады. Егер мәміле толық аяқталса, аргентиналық жұлдыз клубтың негізгі акционері атанады.
Бұл — Мессидің Испаниядағы екінші инвестициясы. Бұған дейін ол сәуір айында каталондық «Корнелья» клубын сатып алған еді.
39 жастағы бұрынғы «Барселона» шабуылшысы қазір «Интер Майамиде» ойнайды. Ол Аргентина құрамасы 2026 жылғы әлем чемпионатының финалында Испаниядан 0:1 есебімен жеңілгеннен кейін халықаралық деңгейдегі мансабын аяқтағанын мәлімдеген.
«Эльденсе» клубының мәлімдемесінде: «Лионель Мессимен Grupo TH Soluciones иелігіндегі акцияларды сатып алу жөнінде алдын ала келісімге қол жеткізілді. Бұл оны клубтың негізгі акционеріне айналдырады», — делінген.
Клуб сонымен бірге мәміле әлі де бірқатар заңдық әрі келісімшарттық рәсімдерден өтуі керегін, оның ішінде тексеру үдерісі мен Испанияның Ұлттық спорт кеңесінің рұқсатын алу қажеттігін атап өтті.
Аликанте қаласында орналасқан «Эльденсе» осы маусымда төрт ойында екі-ақ ұпай жинап, Ла Лига 2 турнир кестесінде 20-орында тұр. Осы аптада команда бас бапкері Клаудио Бараганмен де жолын ажыратқан.
