Жеңілмеген қазақстандық ММА бойынша күрескер, OPEN FC чемпионы Кожахмет Имангали Қырғызстанның танымал өкілі Марсель Нурланбек уулуымен болуы мүмкін кездесу жайлы өз пікірін ортаға салды.
«Марсельмен таныспын, өзара сөйлесіп жүрміз. Оның өз жолы бар, менің өз жолым бар. Меніңше, бұл жекпе-жек болмайды. Марсель шыға қоймас. Егер ол келіссе, мен де шығамын. Бірақ артқа қадам басқым келмейді», — деді Имангали.
Спортшыдан оның деңгейі Марсельден жоғары ма деп сұрағанда, ол: «Қазір келтіріліп жатқан статистикаға қарасақ, әрине, төмен», — деп жауап берді.
Кәсіби деңгейде Кожахмет Имангали он жекпе-жек өткізіп, барлығында жеңіске жетті. Марсель Нурланбек уулуы да ММА-да жеңілмеген, оның есебінде 15 жеңіс бар. Ол жеңіл салмақ дәрежесінде өнер көрсетеді және OCTAGON лигасы мен басқа да азиялық промоушендердегі жекпе-жектерімен танымал.
12 шілдеде Имангали Мәскеуде өткен Open Fighting Championship 67 турнирінде жеңілмеген ресейлік Шалбуз Эседуллаевпен титулдық жекпе-жек өткізген болатын. Қазақстандық спортшы бес раундтың қорытындысы бойынша төрешілердің бірауыздан шешімімен жеңіске жетіп, Open FC-тың жеңіл салмақ дәрежесіндегі чемпион белдігін жеңіп алды.
