Қазақстандық теннисші Елена Рыбакина 2026 жылғы маусымда әйелдер турындағы титулдар саны бойынша жеке-дара көш бастады.
Бұл жетістікке ол Қытайдың Нинбо қаласында өткен WTA 500 турнирінде жеңіске жеткеннен кейін қол жеткізді. Финалда Рыбакина канадалық Лейла Фернандесті 6:2, 6:2 есебімен ұтты.
Осылайша, қазақстандық спортшы биылғы маусымдағы төртінші трофейін иеленді. Бұған дейін ол Australian Open, Штутгарттағы WTA 500 жарысы және US Open турнирлерінде чемпион атанған еді.
Рыбакина бұл көрсеткішімен ең жақын ізін қуушылар — беларусь Арина Соболенко мен ресейлік Мирра Андрееваны басып озды. Екеуінің де еншісінде үш титулдан бар.
Сонымен бірге, Елена Рыбакина 2026 жылы матчтардағы жеңіс саны бойынша да көш бастап тұр. Нинбодағы финалдан кейін оның қоржынында 53 жеңіс болды. Одан кейін 50 жеңістен жинаған Мирра Андреева мен америкалық Джессика Пегула келеді.
Нинбодағы табыс Рыбакина үшін кәсіби мансабындағы 15-трофей, ал WTA 500 санатындағы жетінші титул болды. Оның 15 титулының тоғызы хард төсенішінде келген.
Айта кетейік, Рыбакина Нинбо жарыстарында қатарынан екінші жыл чемпион атанды. 2026 жылғы финалда ол қарсыласына өз подачасындағы бірде-бір геймді бермей, матчты 1 сағат 16 минутта аяқтады.
