Спорттық арбитраж соты (CAS) шайбалы хоккейдің халықаралық федерациясы салған Ресейге қатысты тыйымды жойды. Шешім Швейцарияның Лозанна қаласындағы сот отырысынан кейін жарияланды.
Ресей шайбалы хоккей федерациясы бұл шешімді 2022 жылдың ақпанында Ресейдің Украинаға басып кіруінен кейін енгізілген шектеуге қарсы шағымданған еді. IIHF биыл да Ресей жарыстардан шеттетілген күйі қала береді деген ұстанымда болған.
Украина шайбалы хоккей федерациясы бұл шешімге «терең ашу» білдірді. Ұйым CAS-тың беделі мен өкілетін құрметтейтінін айтқанымен, қауіп-қатерлер жойылмағанын және осындай жағдайда Ресей командаларын халықаралық жарыстарға қайта жіберу ерекше наразылық тудыратынын мәлімдеді.
CAS IIHF келтірген «қауіпсіздік, қорғаныс және өзге де алаңдаушылықтар» жөніндегі уәждер жеткілікті дәлелмен расталмағанын хабарлады. Сот шешіміне сәйкес, Ресей 2026-27 маусымында ерлер мен әйелдер арасындағы әлем чемпионаттарын қоса алғанда, IIHF жарыстарына қайта қосылуы тиіс.
Дегенмен IIHF бұл шешімге өкініш білдіріп, өз ұстанымын қауіпсіздік пен жарыстардың тұтастығын сақтау қажеттілігімен түсіндірді. Федерация CAS-тың шешімін орындауға міндетті екенін айтқанымен, алаңдаушылықтардың әлі де сақталып отырғанын жеткізді.
Германия шайбалы хоккей федерациясының төрағасы Франк Лютц Ресей құрамаларын халықаралық турнирлерге қайтаруға қарсы екенін мәлімдеді. Ұқсас сын пікірді Ұлыбритания, Финляндия және Чехия федерациялары да айтты.
