Қазақстандық боксшы Бек Нұрмағанбет (16-0, 14 нокаут) жуырда Алматыда өткен кәсіби бокс кешінде ресейлік қарсыласы Артыш Лопсанды (14-4-2, 9 нокаут) бесінші раундта нокаутпен жеңіп шыққан еді. Алайда бұл жеңіске қарамастан, боксшы BoxRec.com сайтының рейтингінде керісінше төмендеп кетті.
Супер орта салмақ дәрежесінде Нұрмағанбет бұрынғы 11-орыннан 13-орынға түсіп қалды, яғни екі позицияға шегінді.
Еске салайық, Бек Нұрмағанбет мексикалық атақты боксшы Сауль «Канело» Альвареспен (63-3-2, 39 нокаут) бір командада жұмыс істейді және оның спарринг-серіктесі болып табылады. Алматыдағы кездесуден кейін Альварес қазақстандық боксшыға бейнебайланыс арқылы қоңырау шалып, жеңісімен құттықтаған болатын.
