Қазақстандық алып Закир Найманбаев Сербияның астанасы Белградта өткен Power Slap 22 турнирінде рингке шықты. Оның қарсыласы канадалық спортшы, "Жендет" лақап атымен танымал Райан Кенни болды.
Кездесу Найманбаевтың толық басым түсуімен аяқталды — қазақстандық спортшы қарсыласын нокаутқа ұшыратып, дараланған жеңіске жетті.
Осы жекпе-жекке дейін Закир Найманбаев Power Slap рейтингінде ауыр салмақ дәрежесі бойынша екінші орында тұрған болатын. Ал оның қарсыласы Райан Кенни ауыр салмақтағы үздік ондыққа кірмейтін.
Найманбаевтың соңғы жекпе-жегі осы жылдың наурыз айында өткен еді, онда ол америкалық Уэс Менаны төрешілердің бірауыздан шешімімен жеңіп шыққан. Ал Кенни соңғы рет 2025 жылдың қазан айында рингке шыққан — сол кезде ол америкалық Брайс Джонсты екінші раундта нокаутқа ұшыратқан болатын.
