Жапонияның Аичи мен Нагоя қалаларында өтіп жатқан жазғы Азиада-2026-ның екінші күнінде Қазақстан спортшылары бір күміс және бір қола медаль жеңіп алды.
Каратэден Асель Канай 61 келіге дейінгі салмақта күміс жүлдеге ие болды. Финалда ол Қытай спортшысы Гун Лиден 2:8 есебімен ұтылды. Ал аралас жекпе-жектен Санжар Адилов 65 келіге дейінгі traditional санатында жартылай финалда тәжікстандық Отабек Раджабовқа есе жіберіп, қола медаль алды.
Осы нәтижеден кейін Қазақстан қоржынында сегіз жүлде бар: төрт алтын, бір күміс және үш қола.
ММА-да тағы екі қазақстандық спортшы финалға жолдама алды. Қадырбек Шынбаев 71 келіге дейінгі modern санатында өзбекстандық Нодирбек Шавкатовты 3:0 есебімен жеңіп, енді филиппиндік Жан-Клод Саклагпен кездеседі. Еркінғали Бүркіталин 77 келіге дейінгі traditional санатында Филиппин өкілі Карлос Альваресті нокаутқа түсіріп, финалда Бахрейн намысын қорғайтын Мұхаммад Набиевпен алтынға таласады.
Жүзуде Ксения Игнатова 50 метр арқамен жүзу және 200 метр кешенді жүзуде сегізінші орын алды. Кешенді жүзудің іріктеу кезеңінде ол Қазақстан рекордын жаңартып, 2:14,94 нәтиже көрсетті. Глеб Коваленя 50 метрге еркін стильде жүзуде жетінші болды.
Үстел теннисінен Қазақстанның ерлер құрамасы Лаосты 3:1 есебімен ұтып, топтағы барлық үш матчында жеңіске жетіп, плей-оффқа өтті. Бадминтоншылар Жапониядан 0:3 есебімен жеңіліп, жарысты аяқтады. Ушу-саньдадан Алина Шосова, Карим Иминжанов және Бексұлтан Қоскенов ширек финалға өте алмады.
Су добынан Қазақстанның әйелдер құрамасы Жапонияға 10:25 есебімен жол берді. Енді команда келесі матчта Таиландпен кездеседі. Ал волейболшылар Қытай Тайбэйіне тай-брейкте 2:3 есебімен есе жіберіп, 22 қыркүйекте Вьетнаммен жетінші орын үшін ойнайды.
