ҚФФ президентінің кеңесшісі Нұрсұлтан Құрман SPORT+ арнасына берген сұхбатында Александер Чеферин бұған дейін Қазақстанға келгенін айтты. Ол кезде халықаралық ұйым басшысы "Қайраттың" академиясына барған. Ал Чефериннің бұл жолғы сапары ресми сипатқа ие болады. Әрі Қазақстан футболы күніне орайластырылды.
ҚФФ президенті Марат Омаров ақпан айында Швейцарияның Ньон қаласына барып, УЕФА басшысымен кездескен.
"Кездесу қорытындысы бойынша УЕФА Қазақстан футболын дамытуға толық қолдау көрсететінін айқындады. Бұл инфрақұрылымды жақсарту, балалар мен жасөспірімдер футболын дамыту, ішкі чемпионаттардың деңгейін көтеру, инвестиция тарту және заманауи футбол технологияларын енгізу мәселелерін қамтиды" - деп жазылған ҚФФ таратқан хабарламада. Кездесуде Қазақстанда ірі еуропалық турнирлерді өткізу мүмкіндігі де талқыланды. ҚФФ елімізде Еуропа жастар чемпионатын және Алматы мен Астанада УЕФА Конференция лигасының финалын өткізу туралы ұсыныс жасады.
Марат Омаров Александер Чеферинді Қазақстанға ресми сапармен келуге шақырды. УЕФА басшысы бұл ұсынысты қабылдады. Астанаға сапары кезінде Александер Чеферин бірқатар спорт нысанын аралап көріп, балалармен кездеседі деп жоспарланған.
