Қазақстан құрамасының футболшысы Дінмұхамед Қараман Словакияға қарсы өтетін маңызды матчы алдында команданың көңіл-күйі мен дайындығы жоғары екенін айтты. Оның сөзінше, ойындар арасындағы тығыз кестеге қарамастан, жігіттер бұл сынаққа сақадай сай.
«Бұл сырт алаңдағы екінші маңызды ойын. Ертеңгі матчқа жігіттердің бәрі тас-түйін дайын. Өздеріңіз білетіндей, ойындардың арасы өте аз. Сол үшін бір матчтан екіншісіне жылдам бейімделіп, өз бабымызды көрсетуіміз қажет», — деді ол.
Сонымен қатар, қарсыластың орталық шебіндегі ойыншылардың жоғары деңгейлі чемпионаттарда доп тебетініне тоқталды. Дегенмен, бұл жайт отандастарымызды абдыратпайды:
«Словакияның ортадағы ойыншылары өте мықты, беделді клубтарда ойнайды. Дегенмен, біздің бапкерлік штабымыз оларға қарсы қалай ойнау керектігін, қандай тактика қолданатынымызды толық түсіндіріп жатыр», — деді Дінмұхамед Қараман.
Ұлттық құрамамыздың бұл ойында қандай тактикамен өнер көрсететіні жанкүйерлердің үлкен қызығушылығын тудырып отыр.
