Қазақстандық ауыр атлетика өкілі Бейбарыс Ерсеит Өзбекстанның Ташкент қаласында өткен 17 жасқа дейінгі жасөспірімдер арасындағы Азия чемпионатында топ жарды.
65 келі салмақ дәрежесінде өнер көрсеткен қазақстандық спортшы қос жаттығу қосындысында 281 келі көтеріп, чемпион атанды. Бұл нәтиже 129 келілік жұлқу мен 152 келілік көтеріп ұстаудан құралды.
Атап өтетін жайт, Ерсеит жеке «жұлқу» жаттығуында да топ жарып, осы бағыт бойынша алтын медальға ие болды.
Спортшының екі нәтижесі де 17 жасқа дейінгі санатта жаңа Азия рекорды ретінде тіркелді. Бұл жетістік жас қазақстандық ауыр атлеттің болашағына үлкен үміт артуға негіз болып отыр.
