Ағылшын премьер-лигасының чемпионы «Арсенал» клубы «Ньюкасл Юнайтедтің» капитаны, бразилиялық жартылай қорғаушы Бруну Гимарайысты сатып алуға жақындап қалды. Бірнеше сенімді дереккөздердің мәліметінше, 28 жасар футболшы «канониралар» құрамына қосылуды қалайтынын ашық білдірген.
Гимарайыс 2022 жылы «Лиондан» «Ньюкаслға» ауысқаннан бері клуб үшін 195 матч өткізіп, 31 гол соққан. Ол осы жаз бойы «Арсеналдың» назарында болды.
Лондон клубы бұған дейін футболшы үшін 70 миллион фунт стерлинг ұсынған, бірақ мәмілені бекіту үшін бұл соманы арттыруға тура келеді. Дереккөздердің айтуынша, жаңа ресми ұсыныс әлі жасалмаған, ал «Ньюкасл» клубы ауыстыру жөнінде екі жақ арасында ресми келіссөздер өткен жоқ деп мәлімдейді.
Соған қарамастан, «Арсенал» жақын күндері мәмілені 80 миллион фунт стерлингке дейін жеткізіп, келісімге қол жеткізуді жоспарлап отыр. Гимарайыстың ауысуы туралы үміттің күшеюі Эдди Хаудың «Ньюкасл» бас бапкері қызметінен кетуімен байланысты емес екені атап өтілді.
Айта кетейік, «Арсенал» бұған дейін «Астон Виллдың» шабуылшысы Морган Роджерсті сатып алуға қызығушылық танытқан, алайда клуб өз бағасын 80 миллион фунттан жоғары көтермеді. Нәтижесінде Роджерс «Челсиге» 117 миллион фунтқа ауысты.
«Ньюкасл» болса, тағы бір негізгі футболшысынан айырылу қаупіне тап болып отыр. Бұған дейін Сандро Тонали «Тоттенхэмге», ал Энтони Гордон «Барселонаға» ауысқан болатын. Ал Хау бес жыл жұмыс істеген клубтан бейсенбіде кетіп, оның орнына Саудиттің «Аль-Ахли» бапкері Матиас Ясслені тағайындау жоспарланып отыр.
