Қазақстандық семсерлесуші Кирилл Проходов Азия ойындарының күміс жүлдегері атанды. Финалдан кейін спортшы өз нәтижесіне көңілі толатынын, бірақ алтын медаль үшін аздап тәжірибе жетпей қалғанын айтты.
«Мен өзіме ризамын. Бірақ алтынға өте жақын болғанымды да түсінемін. Бар күшімді салдым, дегенмен сәл жетпей қалды. Қарсыласым өте мықты еді. Кано — екі дүркін Олимпиада чемпионы, әлем чемпионы. Яғни әлем рейтингінде бірінші орында тұрған спортшы. Қиын болды», — деді Проходов.
Ол маусымды да сәтті деп бағалады. Спортшының айтуынша, биылғы нәтиже барлық күткенін де асып түскен.
Проходов ұлттық құраманың негізгі сапында екінші жыл өнер көрсетіп жүргенін айтып, командадағы ахуалдың жақсы екенін жеткізді. Оның сөзінше, ол ұжымға бейімделіп үлгерген, ал жолдастарымен араласуы да, күнделікті қарым-қатынасы да бірқалыпты.
Турнирдің өзі де тартысты өткен. Проходов тайбэйлік қарсыласымен өткен кездесудің ауыр болғанын, оның стилі өзіне қолайсыздық тудырғанын атап өтті. Сол жекпе-жекте ол 10:12 есебімен ұтылып жатып, камбэк жасай алған.
«Финалда, менің ойымша, тәжірибе жетіспеді. Мен біртіндеп тұрақтылыққа қол жеткізіп келемін, бірақ әлі де бас бапкерімізден үйренетін нәрсе көп екенін сеземін. Сол тәжірибе жетіспеуі жеңіліске әсер етті деп ойлаймын», — деді ол.
Алда командалық турнир бар. Проходов құраманың жарысқа толық дайын екенін айтып, алдағы күндері жеңіл дене дайындығы мен қалпына келу жұмыстары жүргізілетінін жеткізді.
Спортшы үшін бұл — ересектер арасындағы жеке сында алғашқы медаль. Бұған дейін ол жасөспірімдер мен жастар санатында жекелей де, командалық та жүлде алған.
