Петропавлдағы «Қарасай» стадионында өткен Қазақстан әйелдер лигасының финалында «БИИК-Шымкент» «Туранды» 3:0 есебімен сенімді жеңіп, чемпиондық атаққа қол жеткізді.
Шымкенттік команда матчтың басында-ақ басымдықты өз қолына алды. 7-минутта Бибігүл Нұрушева есеп ашса, араға екі минут салып Теодора Никоара тағы бір гол соқты.
Екінші таймда да «БИИК-Шымкент» қарқынын төмендеткен жоқ. 54-минутта Гүлнара Ғабелия үшінші голды енгізіп, кездесудің нүктесін қойды.
Осы жеңістің арқасында «БИИК-Шымкент» 2026 жылғы Қазақстан чемпионы атанды және келесі маусымда УЕФА әйелдер Чемпиондар лигасында ел намысын қорғайды.
Қола жүлде үшін ойында «Актөбе» астаналық «Жеңісті» 2:0 есебімен ұтты. 11-минутта Алина Литвиненко мергендік танытса, 61-минутта Айжан Боронбекова екінші голды соғып, жеңісті түбегейлі қамтамасыз етті.
Осылайша, былтырғы чемпион «Актөбе» маусымды үшінші орынмен аяқтады, ал «Жеңіс» жүлдесіз қалды.
