«Астана» бас бапкері Григорий Бабаян Қазақстан Премьер-Лигасының 27-турында Алматының «Қайратын» 1:0 есебімен ұтқаннан кейін ойынға тоқталды.
Бапкердің айтуынша, бұл кездесу тартысқа, эмоцияға және дербиге толы болды. Ол мұндай қарқынмен өтетін матчтарды «Қайратпен» 2014 жылдан бері жиі көретінін айтып, командасының ойында барынша өз футболын көрсетуге тырысқанын жеткізді.
«Жалпы алғанда, әрі қарқыны, әрі дерби тұрғысынан алсақ, мен 2014 жылдан бері „Қайратпен“ матчтарымыз дәл осындай форматта өтіп келеді деп ойлаймын. Мұнда әрдайым көп тартыс, эмоция болады. Гол соғылғанға дейін, тіпті алаңнан қуылғанға дейін де солай болды. Біз өз футболымызды шамамен солай ойнадық. Әрине, ойыншыларға „Біз ештеңе жоғалтпаймыз, тек шығып, өз ойынымызды ойнауымыз керек“ деп айттық. Бірақ қызыл қағаздан кейін, әсіресе бірінші таймда, өз футболымызды көрсете алмадық, бұл рас. Қателіктер көп болды», — деді Бабаян.
Ол «Қайрат» орталық арқылы ойнауға мүмкіндік бермегенін, ал қарсылас 4-3-2 жүйесіне ауысып, ортаны тығыздағанын да айтты. Соның салдарынан алғашқы таймда «Астана» өз қолымен бірнеше қауіпті қарсы шабуылға жол берген.
Екінші таймда да гол соғатын сәттер болғанымен, есеп өзгермеді. Бабаян үшін ең бастысы — жеңіс екеніне назар аударып, мұндай кездесуде әдемі ойыннан гөрі нәтиженің маңызды болғанын айтты. Сондай-ақ ол жанкүйерлерге алғыс айтып, Астанадағы атмосфераны ерекше бағалады.
«Болельщиктер келді, атмосфера керемет болды, мұндай көптен бері болмаған еді. Біз үшін бұл өте маңызды жеңіс. Ең бастысы — осы ойында жеңдік», — деді ол.
Осы жеңістен кейін «Астана» 48 ұпай жинап, турнир кестесінде үшінші орынға көтерілді. «Қайраттың» қоржынында 57 ұпай бар, алматылық клуб екінші орында тұр.
