Қазақстандық теннисші Елена Рыбакина әйелдер теннисі тарихындағы ерекше статистикалық көрсеткіш бойынша үздіктер тізіміне енді.
Ол Ашық дәуірде қазіргі немесе бұрынғы әлемнің бірінші ракеткаларына қарсы матчтардағы жеңіс пайызы жөнінен төртінші орынға көтерілді. Бұл рейтингке кемінде 25 осындай кездесуге қатысқан спортшылар ғана кірген.
Рыбакинаның көрсеткіші — 61,2 пайыз. Оның еншісінде 30 жеңіс және 19 жеңіліс бар. Осы нәтижемен ол немістің аңыз теннисшісі Штеффи Графтан озып, америкалық Мартина Навратиловаға жақындай түсті.
Теннисші әйелдердің әлемнің көшбасшыларына қарсы жеңіс пайызы бойынша үздік бестігі:
1. Серена Уильямс (АҚШ) — 72,9%;2. Ига Швёнтек (Польша) — 71,0%;3. Мартина Навратилова (АҚШ) — 62,2%;4. Елена Рыбакина (Қазақстан) — 61,2%;5. Штеффи Граф (Германия) — 58,9%.
US Open-2026 турниріндегі жетістігі де Рыбакинаның беделін арттырды. Ол төртінші айналымда әлемнің бұрынғы бірінші ракеткасы Наоми Осаканы 6:1, 6:4 есебімен ұтып, алғаш рет АҚШ ашық чемпионатының ширек финалына шықты.
Енді ол қытайлық Олимпиада чемпионы Чжэн Циньвэньмен кездеседі. Бұл ойындағы жеңіс Рыбакинаға жаңартылған WTA рейтингінде әлемнің бірінші ракеткасы атануға мүмкіндік береді.
