«Барыс» шабуылшысы «Сібірге» қарсы ойындағы көп голдың себебін айтты

«Барыс» шабуылшысы Кирилл Ляпунов «Сібірге» қарсы 7:1 есебімен аяқталған кездесуден кейін команданың жеңісіне тоқталды. Ол бұл нәтижені ұжымдық еңбектің жемісі деп бағалады.

— Жақсы командалық жеңіс. Бәрі де жақсы ойнады, бәрі де тырысты. Нәтиже де содан шықты.

Ляпуновтың айтуынша, команда алаңға арнайы гол көп соғамыз деген мақсатпен шықпаған. Соған қарамастан, ойын барысында шабуылдар жиі нәтижесін беріп, соққылар көп жасалған.

— Бүгін жанкүйерлер көп шайба көрді. Бұған не себеп болды?— Білмеймін, голға толы ойынға ерекше көңіл күй болған жоқ. Тек ойнап, өз мүмкіндіктерімізді пайдаландық. Көп соққы жасадық, соның арқасында осындай есеп шықты.

Ойынға жиналған жанкүйерлерді де атап өткен хоккейші толық трибунаның өздері үшін ерекше серпін беретінін айтты. Оның сөзінше, туған қалада, өз командасы үшін мұндай қолдауды сезіну әр ойыншыға қуат береді.

— Командаңның жанкүйерлері мен толы трибунаның алдында ойнау ұнай ма?— Иә, әрине. Адамдар келіп, қолдап, айқайлап отырса, өте жағымды. Бұл — туған команда, туған қала. Бізді қолдауға келген жанкүйерлерге үлкен рақмет.

Сондай-ақ Ляпунов КХЛ-дегі өз дамуы туралы пікір білдірді. Ол жеке көрсеткіштерге қарағанымен, ең бастысы — команданың жеңісі екенін айтты.

— «Барыста» жүргенде лигамен бірге өзіңнің өскеніңді байқайсың ба? Әлде жеке статистикадан гөрі командалық іске көбірек мән бересің бе?— Әрине, кейде жеке статистикама қараймын. Бірақ барынша команда үшін ойнауға тырысамын. Өсу де содан басталады. Ең бастысы — командалық жеңістер. Команданың рухы, эмоциясы келесі ойынға жігер береді. Алаңға шығып, күн сайын жақсара түсуге ұмтыласың.

Хоккейшінің қолында жеңіл жарақат ізі де байқалған. Алайда ол мұның ойын кезіндегі жай ғана сәт екенін, ешқандай күрделі мәселе жоқ екенін айтты.

— Жарақатың байқалады. Бұл ауыр ма, әлде жай ойын кезіндегі сәт пе?— Жай ғана ойын кезіндегі сәт.