Қазақстандық ММА жауынгері Еркебұлан Тоқтар UFC ұйымымен келіссөз жүргізіп жатқанын мәлімдеді.
Ол Instagram желісіндегі парақшасына Париж әуежайынан видео жүктеп, менеджері әрі OCTAGON лигасының басшысы Нұраддин Садыковпен кездескенін көрсетті.
Еркебұлан Тоқтар: «Нуреке Парижге келді. Ертең, Алла қаласа, бізде UFC-пен келіссөздер болады... келіссөздер!», — деді ол күліп. «Бізге сәттілік тілей беріңіздер!»
Нұраддин Садыков: «Егер бәрі ойдағыдай болса! Жақсы жаңалықтар бар!»
Парижде ертең UFC Fight Night 287 турнирі өтеді. Негізгі жекпе-жекте жеңіл салмақта жаңа зеландиялық Дэн Хукер мен француз Салахдин Парнасс кездеседі.
Тоқтар қазіргі таңда Франция астанасында бірнеше күннен бері жүріп, жақында Астанада өткен IBA Nomad турнирінде нокаутпен жеңіске жеткеннен кейін демалысын өткізіп жатыр.
Бұған дейін спортшы UFC-ге баруға асықпайтынын айтқан еді. Оның пікірінше, америкалық ұйым оны күтіп отырған жоқ, ал бастапқы келісімшарттар қаржылай жағынан онша тиімді емес және тәуекелді ақтамайды.
