Қазақстанның белгілі шорт-трекшісі, қысқы спорт түрлеріндегі ұлттық құраманың көшбасшыларының бірі Абзал Ажғалиев кәсіби спорттағы мансабын аяқтайтынын хабарлады.
«Құрметті жанкүйерлер! Мен өмірімде болып жатқан маңызды өзгерістер туралы сіздерге айтуды жөн көрдім. Биыл кәсіби спортшы ретіндегі мансабымды аяқтау туралы шешім қабылдадым», — деді ол.
Ажғалиев спорттағы жолында жинаған тәжірибесі мен білімін Қазақстандағы спортты дамытуға жұмсағысы келетінін айтты. Оның сөзінше, ендігі мақсаты — ұлттық құрамаға жақын болып, жас спортшыларға бағыт-бағдар беру және қазақстандық шорт-тректің болашағы үшін еңбек ету.
Ол осы жылдар бойғы қолдау үшін отбасына, бапкерлеріне, командаластарына, дәрігерлер мен мамандарға алғыс білдірді. Сондай-ақ жанкүйерлерге де ризашылығын жеткізіп, алдағы уақытта да ұлттық құрамаға қолдау көрсетуді сұрады.
Абзал Ажғалиев — Азия ойындарының жеңімпазы, Универсиада жүлдегері, 2016 жылы әлем кубогы кезеңінде алтын алған алғашқы қазақстандық спортшы. Ол Олимпиада ойындарында Қазақстанның ту ұстаушысы ретінде екі мәрте шыққан. Спортшының ең үздік нәтижесі — 2022 жылғы Бейжің Олимпиадасындағы 4-орын.
2026 жылғы Милан Олимпиадасында Ажғалиев 500 метрге іріктеу жарысында жеңіске жетіп, кейін жарысты ширек финалда аяқтады.
