Волкановски мен Евлоев жекпе-жегі қауіп астында қалды
Александр Волкановскидің аяғындағы стафилококк инфекциясы UFC 333 турниріндегі титулдық айқасқа әсер етуі мүмкін. Белдесу 24 қазанда Абу-Дабиде өтуі тиіс.
UFC-дің жартылай жеңіл салмақтағы чемпионы Александр Волкановски мен жеңілмеген үміткер Мовсар Евлоев арасындағы титулдық жекпе-жек қауіп астында қалды.
Бұған Волкановскидің жаттығудан жариялаған суреттерінен кейін оның аяғында стафилококк инфекциясы болуы мүмкін деген ақпарат себеп болып отыр. Егер бұл расталса, австралиялық спортшы емделу үшін уақытша жаттығуын тоқтатуға мәжбүр болады.
24 қазанда өтетін айқас қарсаңында мұндай үзіліс дайындыққа айтарлықтай соққы болуы ықтимал. Әсіресе, Волкановскидің Евлоев сияқты қауіпті әрі жеңілмеген қарсыласқа қарсы оңтайлы қалыпта келуі аса маңызды.
Тіпті ол тез сауығып кетсе де, инфекция, емделу және мәжбүрлі үзіліс оның жалпы бабына әсер етуі мүмкін екені айтылып жатыр.
Волкановски мен Евлоевтың жекпе-жегі 24 қазанда Абу-Дабиде өтетін UFC 333 турнирі аясында жоспарланған. Кездесуде UFC-дің жартылай жеңіл салмақтағы чемпиондық белбеуі сарапқа салынады. Евлоев бұл жекпе-жекке 20-0 нәтижесімен, яғни кәсіби мансабында жеңілмеген күйде келеді.