Алматылық «Қайрат» Еуропа лигасы плей-офф кезеңінің қарымта матчы алдында Брюссельде жаттығу өткізді.
Клубтың Instagram парақшасында «Лотто Парк» стадионындағы дайындық сәттері жарияланды. Видеода ойыншылардың Бельгия астанасындағы аренаның алаңына шыққаны көрсетілген.
Жазбада шабуылшы Азамат Тұяқбаев, қорғаушы Еркін Тапалов, қақпашы Шерхан Қалмырза, команда капитаны әрі қорғаушы Александр Мартынович және бас бапкер Рафаэль Уразбахтин көрінеді.
«Ойын алдындағы жаттығу», — деп жазылған жарияланымда.
«Андерлехт» пен «Қайрат» арасындағы қарымта кездесу 27 мен 28 тамызға қараған түні Брюссельде өтеді. Бұған дейін Алматыда, 20 тамыз күні Орталық стадионда өткен алғашқы матчта қазақстандық клуб 0:3 есебімен жеңіліп қалған еді.
