Неміс жартылай қорғаушысы Леон Горецка жақын уақытта Англия премьер-лигасына ауысуы мүмкін. Ол «Астон Вилла» сапына қосылуға жақын.
Флориан Плеттенбергтің мәліметінше, тараптар толық келісімге келген. Соңғы мақұлдау да беріліп, мәміленің соңғы тұстары нақтыланған.
Қазір Горецканың медициналық тексерістен өтуі ғана қалды. Қысқа уақыт ішінде бәрі аяқталса, футболшы екі немесе үш жылдық келісімшартқа қол қоюы мүмкін.
Айта кетсек, «Астон Вилланың» бас бапкері Унаи Эмери келіссөздерде шешуші рөл атқарып, Горецкамен жеке сөйлескен. Эмери оны жобаның болашағына сендірмек болған.
Клуб соңғы 72 сағатта белсенділігін айтарлықтай күшейткен. Ал Горецка жазда «Бавариямен» сегіз жылдық кезеңін аяқтап, еркін агент ретінде кеткен еді.
