Қазақстандық теннисші Елена Рыбакина әлемнің бұрынғы және қазіргі бірінші ракеткаларына қарсы ойындардағы жеңіс пайызы бойынша әйелдер теннисі тарихында үшінші орынға көтерілді. Бұл көрсеткіш 1975 жылдан бастап кемінде 25 осындай матч өткізген теннисшілер арасында есептелген.
Рыбакинаның есебінде әлемнің бірінші номерлеріне қарсы 29 жеңіс пен 17 жеңіліс бар. Оның жеңіс пайызы 63 пайызды құрайды. Осылайша қазақстандық спортшы теннис тарихындағы аңызға айналған Мартина Навратилова мен Штеффи Графтан жоғары тұрды.
Рейтингте Рыбакинадан жоғары тек екі теннисші орналасқан — Серена Уильямс (72,9%) және Ига Швёнтек (71,0%). Ал төртінші орында Навратилова (62,2%), бесінші орында Граф (58,9%) тұр.
Қазіргі уақытта Рыбакина Канададағы Торонто қаласында өтіп жатқан WTA 1000 турнирінде сәтті ойнап жатыр. Ол жартылай финалға жолдама алу үшін өткен матчта жапон теннисшісі, әлемнің бұрынғы бірінші ракеткасы Наоми Осаканы 4:6, 7:6, 6:4 есебімен жеңді. Финалға шығу жолындағы кездесуде Рыбакина америкалық теннисші Кори Гауффпен ойнайды.
