Бэйлидің хет-тригі «Барысқа» «Металлургті» жеңуге көмектесті

Джастин Бэйлидің хет-тригі «Барысқа» Шығыс конференциясының көшбасшысы магнитогорлық «Металлургті» 5:4 есебімен ұтуға көмектесті. Бұл нәтиже елордалық клубты Шығыста бесінші орынға шығарды.

Ойыннан кейін Бэйли матчтағы әсерімен бөлісіп, мұндай жеңістің мәні зор екенін айтты. Оның сөзінше, ұзақ сапардан кейін үйде жанкүйерлердің толы трибунаның алдында ойнау командаға ерекше қуат берген.

«Мұндай кеште бәрі де сәтті шықты. Үйде осындай ұзақ сапардан кейін жеңу өте жағымды, ол сапар мәңгілікке созылғандай болды. Толы трибунаның алдында ойнау бізге көп энергия мен жігер береді. Үйдегі екі матчта қатарынан жеңу біз үшін өте маңызды».

Бэйли хет-трик жасаудың өзі оңай емес екенін де атап өтті. Оның айтуынша, команда алғашқы кезеңде басым түсіп, соңында тартысты сәттерде қорғана білді, ал азшылықта ойнаған кезеңде де сенімді әрекет етті.

«Менің анам мен әжем әрдайым “қане, хет-трик жаса” дейді. Мен оларға бұл оңай емес деп жауап беремін. Бүгін бәрі жұмыс істеді, біз матч барысын өз жағына бұра алдық, алғашқы кезеңде жеңдік, үшінші кезеңде шыдап тұрдық және тағы да гол соқтық. Азшылықта ойнауымыз тамаша болды, Шутов әдеттегідей керемет ойнады. Командалық жұмыс пен дұрыс көзқарас бүгін лиганың ең мықты командасын жеңуге мүмкіндік берді».

Соңғы минуттарда да қарсылас беріспеген. Бэйлидің айтуынша, «Металлург» бос қақпаға гол соққаннан кейін де шабуылды үдете түскен, сондықтан шешуші сәтте тәртіп пен ұжымдық қорғаныс ерекше рөл атқарған.

«Олар гол соғатын команда. Кездейсоқ емес, лигада ең көп шайба салған командалардың көшбасында тұр. Біз бос қақпаға гол жібергеннен кейін де олар өз мүмкіндігін пайдалануға тырысты. Бізді әсіресе ойынның соңындағы төрт минутта аман алып қалған азшылықтағы ойынымыз болды, сондай-ақ бес минуттық айыпты да еңсердік. Көшбасшыны жеңу үшін тек командалық тәсіл керек».

Ол сондай-ақ Бейбарыс Оразовтың төбелеске араласып, өзін қорғағанын жоғары бағалады. Бэйли мұны команда ішіндегі бірліктің белгісі деп санады.

«Иә, мұндай матчта қарсыласпен қақтығыстар болады, кейде силалық әдістерге түсіп қаласың. Сондай кезде әрдайым біреу араша түсіп, қорғауға келеді. Бұл біздің ұжым ретінде қандай екенімізді көрсетеді. Ойыннан кейін мен оған барып, құшақтадым, бүкіл команда бірден штраф-бокста алғыс айтты. Қорғаныстағы жұмыс, соққыларды бөгеп тастау және серікті қорғау үшін қолғап тастау — мұның бәрі команданы күшейтеді, бұл нағыз тату ұжымның жақсы көрсеткіші».

Бэйли «Барыста» өзін жақсы сезінетінін де жасырмады. Оның айтуынша, бірнеше айдың ішінде-ақ қала мен жанкүйерлер оны жылы қабылдаған.

«Командадағы ең танымал ойыншы болу өте жақсы. Мен мансабымда көптеген жерде ойнадым, матч басталмай тұрып-ақ адамдардың көзқарасын, плакаттардың бәрін көремін. Үйге оралу мотивация береді, жанкүйерлер, толы трибуналар. Бұл қалада мені жылы қарсы алатынын сеземін. Мұндағы үш ай керемет өтті!»