Александр Кузнецов: жиі бапкер ауыстыру Қазақстан футболына пайда әкелмейді
Қазақстан құрамасының Молдоваға есе жіберуі талқыланып жатыр. Александр Кузнецов мұндай сәтте ұлттық командаға тұрақтылық пен дұрыс бапкерлік шешім қажет екенін айтты.
Қазақстан құрамасы Лига нациясы 2026/27 маусымының топтық кезеңіндегі бесінші турда Молдоваға 1:2 есебімен ұтылды. Жалғыз голды Ислам Чесноков соқты. 16 қарашада қазақстандықтар өз алаңында Словакиямен кездеседі, ал бес турдан кейін құрама C3 тобында екі ұпаймен соңғы орында тұр.
Осы ойыннан кейін белгілі қазақстандық футбол маманы Александр Кузнецов ұлттық құраманың жағдайына тоқталып, қысқа мерзімде нәтиже шығару оңай емес екенін айтты. Оның пікірінше, мәселені тек таблодағы есеппен шектеуге болмайды, өйткені әр сәтсіздіктің артында тереңірек себептер жатады.
— Нидерланд маманының Қазақстандағы қысқа жұмыс кезеңінде көздеген нәтижеге қол жеткізуі мүмкін болмады. Футболда мұндай жағдайлар болады. Басқа футбол мәдениеті, менталитет ерекшелігі, ойыншылардың деңгейі мен мүмкіндігі, біздің футболдың өзіндік қырларын түсіну үшін уақыт керек, — деді Кузнецов.
Ол команданың әр матч алдында құрамы қатты өзгеріп отырғанын да атап өтті. Маманың пікірінше, бұл бапкерлік штабтың оңтайлы құрамды әлі таппағанын және тұрақтылық орната алмағанын көрсетеді.
Кузнецов сонымен бірге тілдік кедергі мен психологияның маңызына назар аударды. Оның айтуынша, футболшылардың өз сөздерінде ішкі қысым бар екенін аңғаруға болады, ал мұндай кезеңде командаға ойыншыны жігерлендіре алатын, сенімін қайтара алатын бапкер қажет.
Маманның ойынша, ұлттық құрамаға дәл қазір жарқын еуропалық есімнен гөрі қазақстандық футболды, менталитетті және ойыншылардың мүмкіндігін жақсы білетін жергілікті бапкер немесе дағдарыстан шығара алатын тәжірибелі маман қажет болуы мүмкін.