Қорсунский «Барыс» сапарын бағалап, плей-оффқа жол ашатын шартты атады

Астаналық «Барыс» Құрлықтық хоккей лигасындағы кезекті сырт алаңдағы сериясын аяқтады. Михаил Кравецтің шәкірттері сапар барысында «Тракторға» 1:2, «Адмиралға» 4:5 және «Амурға» 0:2 есебімен есе жіберді.

Жалпы, тоғыз ойынға созылған бұл сырт алаңдағы серияда «Барыс» үш жеңіс алып, алты рет жеңілді. Қазір қазақстандық клуб Шығыс конференциясында бесінші орында тұр.

Қазақстан шайбалы хоккей федерациясының бұрынғы вице-президенті Владимир Қорсунский «Амурдан» болған жеңіліс туралы пікірін білдіріп, команданың ойыны ұнағанын айтты. Алайда оның сөзінше, мәселе гол соғуда болып тұр.

— Бір сөзбен айтсам — жолы болмады. «Барыс» жақсы ойнады, маған ұнады. Бірақ біздің командада гол соғатын ешкім жоқ. Бэйли мергендік таныта алмады, ал оған көмектескісі келетін ешкім жоқ. Мүмкіндіктерді пайдалану керек. Қайыржанның екі ойыншымен қақпашымен бетпе-бет шыққан сәті қандай еді... Сол кезде гол соқса, кеше кем дегенде бір ұпай алар едік. Өкінішті-ақ!

Қорсунский тоғыз матчтық сырт алаңдағы серияны да сәтті деп есептемейді. Оның ойынша, «Барыс» бұдан әлдеқайда жақсы нәтиже көрсетуге тиіс еді, ал бір шайбаның айырмасымен кеткен жеңілістер команданың әлеуетін толық ашпай отырғанын байқатады.

Ол сондай-ақ командадағы ішкі босаңсуға назар аударды. Қорсунскийдің пікірінше, сәтті басталған матчтардан кейін ұжым бәрі оңай бола береді деп ойлап қалған, ал бұл кейінгі сәтсіздіктерге әсер еткен.

Владимир Қорсунскийдің айтуынша, қазір «Барысқа» екінші және үшінші звенолардан көбірек белсенділік қажет. Сонымен бірге қақпашылардың ойынына оң баға берді. Ал плей-оффқа шығу мүмкіндігі бар екенін айтып, маусым соңында команданы Шығыс конференциясында төртінші-бесінші орындардан көргісі келетінін жеткізді.