Азия Пара ойындарының төртінші күнінде Қазақстан спортшылары 2 алтын, 1 күміс және 4 қола медаль жеңіп алды. Туризм және спорт министрлігінің мәліметіне сай, елдің жалпы көрсеткіші қазір 21 медальге жетті: 5 алтын, 6 күміс және 10 қола.
Парадзюдодан Бексұлтан Құлмырза ерлер арасындағы 81 келіге дейінгі J2 санатында чемпион атанды. Финалда ол Оңтүстік Корея өкілі Ким Дон Хунды жеңді. Сондай-ақ, қазақстандық екі дзюдошы қола жүлдеге қол жеткізді.
Әйелдер арасындағы J2, 60 келіге дейінгі салмақта өнер көрсеткен Даяна Федосова Сингапур спортшысы Джоан Хун Хуи Синді иппонмен ұтып, қола медаль иеленді. Ерлер арасындағы J2, 81 келіге дейінгі бәсекеде Ғалымжан Смағұлұлы Иран өкілі Реза Ғоламиді жеңіп, қола жүлдеге ие болды. Ал Бауыржан Арстанбеков пен Динара Құжұлова жүлдегерлер қатарына кіре алмады.
Пара жүзуден Диас Кенжебек ерлер арасындағы S10 санатында 100 метрге шалқалап жүзуде алтын медаль алып, Азия рекордын жаңартты. Ол мәреге 1:01.98 уақытта жетті, ал бұған дейінгі өңірлік рекорд 1:03.73 болатын. Бұған дейін Кенжебек 200 метрге жеке жүзуде 2:21.61 нәтижесімен күміс жүлде алған еді.
Жүзудің басқа финалдарында Ержан Сәлімгерейев ерлер арасындағы S6 санатындағы 100 метр еркін әдісте төртінші, Бекассыл Қасымбек сегізінші орын алды. Әйелдер арасында Наталья Звягинцева 1:30.98 нәтижесімен бесінші, ал Зарина Мұрзагалиева 1:36.31 уақыт көрсеткішімен алтыншы орынға тұрақтады.
Қазақстан параүстел теннисінде де тарих жасады: бұл спорт түрінен Азия Пара ойындарындағы алғашқы медальдарын еншіледі. Ардақ Нұрмағамбетов Үндістан өкілі Сандип Дангиді 3:0 есебімен ұтып, қола медаль алды. Али Махұлбеков те жартылай финалда Гонконг спортшысы Чжао Шуайдан 0:3 есебімен жеңілсе де, қола жүлдеге қол жеткізді.
