Қазақстан Азиада-2026-ның тоғызыншы күнінде бес медаль жеңіп алды
Айти мен Нагоядағы жазғы Азия ойындарының тоғызыншы жарыс күнінде Қазақстан құрамасы бес жүлдеге қол жеткізді. Оның үшеуі күміс, екеуі қола медаль болды.
Айти мен Нагояда өтіп жатқан жазғы Азия ойындарының тоғызыншы жарыс күні Қазақстан құрамасы бес медаль жеңіп алды. Спортшылар үш күміс және екі қола жүлдеге қол жеткізді.
Күміс медаль иегерлерінің қатарында ауыр атлеттер Алексей Чуркин мен Нұрғиса Әділетұлы, сондай-ақ жеңіл атлет Аделина Земс бар. Чуркин 85 келіге дейінгі салмақта 378 килограмм нәтиже көрсетті: жұлқа көтеруде — 173, серпе көтеруде — 205 килограмм. Ол Солтүстік Корея өкілі Но Гван Рөлден бір килограмм ғана қалып қойды.
Нұрғиса Әділетұлы 95 келіге дейінгі салмақта күміс алды. Оның қос сайыстағы нәтижесі — 394 килограмм: жұлқа көтеруде 177, серпе көтеруде 217 килограмм. Бұл салмақта ирандық Али Алипур 398 килограмммен жеңіске жетті.
Аделина Земс 400 метрге кедергілер арқылы жүгіруде екінші орынға табан тіреді. Ол қашықтықты 54,58 секундта жүгіріп өтті және жеке рекордын жаңартты. Жарыс жеңімпазы әрі Азия ойындарының рекордын орнатқан Біріккен Араб Әмірліктері өкілі Мариам Карим болды — 54,31.
Қола медаль кураштан Адилет Ахметғалиға бұйырды. 81 келіге дейінгі салмақ дәрежесінің жартылай финалында ол өзбекстандық Ақрор Зиёдуллаевтан 0:10 есебімен жеңілді. Сондай-ақ әртістік жүзуден Қазақстан құрамасы аралас командалар жарысында 216,7961 ұпай жинап, қола жүлдегер атанды.
Осы күндегі бокс жарысында да қазақстандықтар сәтті өнер көрсетті. Алуа Балқыбекова 51 келіге дейінгі салмақта жапониялық Юна Нисинаканы 3:2 есебімен, Махмуд Сабырхан 55 келіге дейінгі салмақта оңтүстіккореялық Шин Джэ Ёнды 3:1 есебімен жеңді. Торехан Сабырхан ирактық Әли Қасым Хамдан әл-Саррайды бірінші раундта нокаутқа түсірсе, Наталья Богданова 75 келіге дейінгі салмақта өзбекстандық Азиза Зокировадан 4:1 есебімен басым түсті.
Ал Нұрбек Оралбай 90 келіге дейінгі салмақта ширек финалда өзбекстандық Турабек Хабибуллаевқа 2:3 есебімен есе жіберіп, жүлдесіз қалды. Соған қарамастан, қазақстандық боксшылардың бесі жартылай финалға жолдама алып, кемі қола медальді қамтамасыз етті.
Тоғызыншы жарыс күнінен кейін Қазақстан құрамасының қоржынында 9 алтын, 13 күміс және 13 қола медаль бар. Жалпы есептегі жүлде саны — 35, ал Қазақстан медаль кестесінде бесінші орында келеді. Жазғы Азия ойындары 4 қазанда аяқталады.