Қазақстандық шпажашылар Азия ойындарында тарихи алтын жеңіп алды
Қазақстанның ерлер құрамасы Аичи мен Нагояда өткен 2026 жылғы Азия ойындарында шпагамен семсерлесуден алтын медаль иеленді. Жеңістен кейін құраманың мүшелері финалдағы тартысты сәттер мен командалық рух туралы пікір білдірді.
Қазақстанның ерлер құрамасы Аичи мен Нагояда өткен 2026 жылғы Азия ойындарында шпагамен семсерлесуден алтын медаль жеңіп алды. Финалда қазақстандықтар Оңтүстік Корея құрамасын ұтып, тарихи табысқа қол жеткізді.
Жеңістен кейін Руслан Курбанов, Кирилл Проходов, Ерлік Сертай және Вадим Шарлаимов шешуші кездесудің қалай өткенін айтып берді. Ерлік Сертай қарсыластың деңгейі жоғары болғанын атап өтіп, бір сәтте жағдай күрделеніп кеткенін жасырмады.
«Шынында да, Оңтүстік Корея — өте мықты команда. Бір кезде менің кесірімнен ұтылып қала жаздадық. Бұл — менің кінәм. Бірақ жігіттер қысымға төтеп беріп, бәрін еңсерді де, соңында «алтынды» жеңіп алды», — деді Сертай.
Вадим Шарлаимов қиын сәтте команда бір-біріне дем беретінін айтты. Оның сөзінше, ұтылыс та, жеңіс те болады, бірақ ең бастысы — бірлік.
«Ештеңе етпейді. Біреу ұтады, біреу ұтылады. Бірақ біз — команда. Қиын кезде жолдасымызды қолдап, бірге тұрдық. Өз мүмкіндігімізді көрсеттік», — деді Шарлаимов.
Кирилл Проходов шешуші кезеңнің алдында өзіне сенімді болғанын жеткізді. Ол ақылға қонған жоспарының бәрі жүзеге асқанын айтты.
«Шешуші кездесуде мен жеңіле алмайтындай күйде болдым. Не ойласам, соның бәрі орындалды. Керемет финал болды», — деді Проходов.
Руслан Курбанов Азиядағы шпагамен семсерлесудің деңгейі өте жоғары екенін айтып, Қазақстан құрамасының өсімін ерекше атап өтті. Оның пікірінше, мұндай жарыстарда бір-екі укол бәрін шешеді.
«Азия ойындары әрқашан өте шиеленісті өтеді, тартыс деңгейі жоғары. Азияда жоғары деңгейде семсерлесетін көп команда бар. Бәсеке өте күшті. Бәрін бір-екі укол шешеді. Көп қысым болды — жарыста да, дайындықта да. Қазақстан семсерлесудің элитасына кірді. Нәтиже соны көрсетіп тұр. Енді аздап қуанып алып, әрі қарай жұмыс істей береміз. Алда Олимпиада іріктеуі тұр. Қолдаған жанкүйерлердің бәріне рахмет, үлкен алғыс! Алға, Қазақстан!» — деді Курбанов.
Айта кетейік, осы құрам шілде айында да тарих жасап, командалық сайыста әлем чемпионатының алтын медалін алғаш рет жеңіп алған еді.