Карлос Пратес Ислам Махачевпен жекпе-жекке шығатынын мәлімдеді
UFC-дің жартылай орта салмақтағы бразилиялық файтері Карлос Пратес келесі қарсыласы Ислам Махачев болатынын айтты. Оның сөзінше, титулдық жекпе-жек мәселесі шешілген, тек уақыты әлі нақтыланбаған.
UFC-дің жартылай орта салмақтағы бразилиялық файтері Карлос Пратес келесі жекпе-жегінде Ислам Махачевпен кездесетінін мәлімдеді.
Пратестің айтуынша, титулдық айқасқа қатысты мәселе шешілген, алайда нақты күні әлі белгісіз. Ол жекпе-жекті желтоқсанда Лас-Вегаста өткізгісі келетінін айтқанымен, бұл нұсқа жүзеге аспайтынын да жасырмады.
«Менің келесі жекпе-жегім — Ислам Махачевке қарсы. Мәселе шешілді. Қашан болатынын білмеймін, бірақ бұл айқас өтеді. Оны желтоқсанда Лас-Вегаста өткізгім келер еді, бірақ, менің ойымша, ол болмайды. Бәлкім, қаңтарда болар», — деді Пратес N3on стримеріне берген сұхбатында.
Бұған дейін бразилиялық спортшы UFC оған жартылай орта салмақта келесі титулдық мүмкіндік беруге уәде еткенін айтқан. Сондай-ақ ол Махачевпен 12 желтоқсанда Лас-Вегаста өтетін UFC 335 турнирінде кездесу ең қолайлы нұсқа болатынын жеткізген еді. Ал промоушн өкілдері жекпе-жекті қаңтарда Австралияда ұйымдастыру мүмкіндігін айтқан.
Пратес соңғы кездесуінде UFC-дің бұрынғы чемпионы Джек Делла Маддаленаны нокаутқа түсірген. Ал Махачев тамыз айында UFC 330 турнирінде жартылай орта салмақтағы титулын алғаш рет қорғап, Иэн Мачадо Гэрриді жеңген.
Қазіргі уақытта UFC Махачев — Пратес жекпе-жегін ресми түрде жариялаған жоқ және оның өтетін күнін де атаған жоқ.