Абдурашид Абдуллаев Азиада финалына техникалық нокаутпен шықты
Қазақстандық ушу шебері Абдурашид Абдуллаев Қытай Тайбэйі өкілін жеңіп, Азиада-2026 финалына жолдама алды. Енді ол алтын медаль үшін ирандық Сохейл Мусавимен кездеседі.
Қазақстандық ушу-саньда шебері Абдурашид Абдуллаев Азиада-2026-ның жартылай финалында жеңіске жетіп, шешуші айналымға өтті.
Айти мен Нагояда өтіп жатқан додада 75 келіге дейінгі салмақтағы жартылай финалдық жекпе-жекте оның қарсыласы Қытай Тайбэйінен келген Чжан Хуань И болды. Кездесу Абдурашидтің техникалық нокаутпен жеңуімен аяқталды.
Осылайша, қазақстандық спортшы енді алтын медаль үшін ирандық Сохейл Мусавимен күш сынасады. Ал тайваньдық ушу шебері қола жүлдегер атанды.
Ушу-саньда жарысының финалдық кездесулері бейсенбі, 24 қыркүйекте өтеді.
Айта кетейік, бүгін бұған дейін тағы бір қазақстандық ушу шебері Алижан Аблагатов (70 кг) жартылай финалда жеңіліп, қола медаль иеленген еді.