Астанада ҚФФ-ның 2027-2032 жылдарға арналған стратегиясы таныстырылды
Астанада Қазақстан футбол федерациясының кезекті конференциясы аясында 2027-2032 жылдарға арналған жаңа даму стратегиясы бекітілді.
Құжат қазақстандық футболды дамытудың ұзақ мерзімді бағдарларын айқындайды және таланттарды, инфрақұрылымды және ойын мәдениетін дамыту арқылы мықты футбол экожүйесін қалыптастыруға бағытталған. Стратегияның миссиясы – бұқаралық және балалар мен жасөспірімдер футболынан бастап, кәсіби клубтар мен ұлттық құрамаларға дейінгі барлық деңгейде тұрақты дамуды қамтамасыз ету.
2032 жылға дейінгі стратегияның пайымы үш қағидаға негізделген: Қазақстанды біріктіретін футбол, ел мақтан тұтатын құрамалар және футбол барлығына қолжетімді аймақтар.
ҚФФ сегіз негізгі мақсатты айқындады. Олардың қатарында ұлттық құрамалардың бірінің әлем немесе Еуропа чемпионатының финалдық кезеңіне қатысуы, кәсіби клубтарды жекешелендіру, УЕФА лицензиясы бар бапкерлер мен мамандар санын 5000-ға дейін арттыру, инфрақұрылымдық қолжетімділікті 10 000 адамға бір футбол алаңы көрсеткішіне дейін жақсарту, «ҚФФ Паспорт» жүйесінде 1,5 миллион қатысушыны тіркеу, KFF-тің бес немесе одан да көп академиясын іске қосу, Еуропаның жетекші 8 лигасында бес немесе одан да көп қазақстандық ойыншының өнер көрсетуі, сондай-ақ Қазақстанда ірі халықаралық футбол турнирін немесе матчын өткізу бар.
Бұл мақсаттарға жету үшін стратегия жеті бағытты қарастырады: ұлттық құрамалар, балалар мен жасөспірімдерді дамыту, бапкерлерді, төрешілерді және мамандарды даярлау, инфрақұрылым, кәсіби лигалар, әйелдер футболы, бұқаралық және әлеуметтік футбол. Оларды жүзеге асыруға төрт драйвер қолдау көрсетеді: коммерцияландыру және маркетинг, адал ойын және этика, цифрландыру және деректер, басқару және ынтымақтастық.
Стратегияның негізгі элементтерінің бірі – ойыншыларды сәйкестендіру мен іріктеуді, ұлттық құрамалардың ойын моделін, жаттығу процесі мен футболшыларды бағалау жүйесін айқындайтын бірыңғай философия – «Batyr Zholy» болмақ.
Балалар мен жасөспірімдер футболында ҚФФ «Болашақ чемпиондар» жобасын дамытуды және бірыңғай Talent ID жүйесін енгізуді жалғастырады. Ол ойыншылардың цифрлық профильдерін, скаутингтің бірыңғай стандарттарын, өңірлік іріктеу және дамыту орталықтарын, сондай-ақ академиялар мен клубтарды жалпы даярлау жүйесіне біріктіруді қарастырады.
Кадрларды даярлау бағытында стратегия лицензиясы бар бапкерлер, төрешілер және мамандар санын арттыруды, нұсқаушылар мен тәлімгерлер жүйесін дамытуды, өңірлік оқыту орталықтарын кеңейтуді және білім беру процестерін цифрландыруды көздейді.
Инфрақұрылымдық блок заманауи стадиондар салуды, қолданыстағы футбол алаңдарын жаңартуды, өңірлік ҚФФ академияларын және клубтық инфрақұрылымды дамытуды қамтиды. 2032 жылға қарай кемінде 1300 жаңа алаң салу, УЕФА санаттары бойынша кемінде 12 жаңа стадионды іске қосу және кемінде бес өңірлік ҚФФ академиясын құру жоспарлануда.
Стратегияда кәсіби лигаларға, әйелдер, бұқаралық және әлеуметтік футболға ерекше назар аударылған. ҚФФ клубтардың тұрақтылығын арттыруды, матчтарға келушілер санын көбейтуді, әйелдер футболында ойыншыларды іріктеу және даярлау жүйесін кеңейтуді, сондай-ақ мектептегі, әлеуметтік және инклюзивті жобаларды дамытуды жоспарлап отыр.
ҚФФ-ның 2027-2032 жылдарға арналған стратегиясы қазақстандық футболды жүйелі түрде дамыту, ойыншылар мен мамандарды даярлау сапасын арттыру, футбол инфрақұрылымын кеңейту және футбол еліміздің барлық өңірлерінде қолжетімді болатын жағдайлар жасау үшін жол картасына айналады.