Жошуа Ван реваншта Пантожаны ұтып, UFC чемпионы атағын сақтап қалды
Мьянмалық Жошуа Ван Лос-Анджелесте өткен UFC 331 турнирінде Александар Пантожаны төрешілердің бірауызды шешімімен жеңді. Осылайша ол жеңіл салмақтағы чемпиондық белбеуін қорғап қалды.
Жошуа Ван Лос-Анджелесте өткен UFC 331 турнирінде Александар Пантожаны бір ауыздан қабылданған төрешілер шешімімен жеңіп, жеңіл салмақтағы чемпиондық атағын сақтап қалды.
24 жастағы мьянмалық спортшы Пантожаны 2025 жылдың желтоқсанында да ұтқан. Ол кезде бразилиялық файтер жекпе-жектің 26-секундында кездейсоқ шынтақтан иығын шығарып алып, айқасты жалғастыра алмаған еді.
UFC-де 2000 жылдан кейін туған алғашқы чемпион атанған Ван мамыр айында Тацуро Таираны да жеңіп, белбеуін қорғаған болатын. Енді ол 36 жастағы Пантожаны қайта ұтып, салмақтағы ең мықты спортшы екенін тағы дәлелдеді.
«Көп адам ол кездегі жеңісім кездейсоқ болды деді. Енді күмәндана берсін», — деді Ван жекпе-жектен кейін.
Айқастың алғашқы раундында Пантожа Ванды жерге түсіріп, ауыр соққылар мен тізе соққыларын дарытты. Ван да босқа отырған жоқ, ол қарсыласын өткір шынтақпен қарсы алды.
Екінші раундта Ван джебтерін дәл тигізіп, ал үшінші раундта комбинацияларымен бразилиялық спортшыны есеңгіретіп қойды. Төртінші раундта Пантожа ерте тейкдаун жасап, бақылауды өз қолына алғанымен, Ванның қорғанысынан өте алмады әрі тұншықтыру әдісін жасай алмады.
Шешуші раундта Ван Пантожаны қыспаққа алып, оң қолмен жоғарыдан соққы жасады. Осы эпизод жекпе-жектің тағдырын шешіп, жеңіс Ванның пайдасына жазылды.
Сондай-ақ кештің екінші басты жекпе-жегінде Арман Царукян Маурисиу Руффиды алғашқы раундта нокаутқа түсіріп, жеңіл салмақтағы чемпион Джастин Гейджиге қарсы титулдық айқас сұрады. Ал Шотландияда туған, Австралия атынан өнер көрсететін Кейси О'Нил Эдуарда Моураны қолмен тұншықтыру әдісімен жеңді.
Турнир барысында 14 қарашада Нью-Йорктегі Madison Square Garden аренасында өтетін UFC 334 турнирінің де толық кард құрамы бекітілді. Уақытша ауыр салмақ чемпионы Сирил Ган титулы бос қалғаннан кейін Джош Хокитпен жекпе-жек өткізеді, ал Кайла Харрисон екі салмақта чемпион атанған Аманда Нуньеспен кездеседі.